«Бичик» кинигэлэрин аахтарыҥ, оҕоҕут билиитин кэҥэтиҥ!

ИА SakhaLife

1-3 диэри саастаах оҕо аан бастаан ахсааны билэ-көрө, өҥ-дьүһүн арааһын араара үөрэнэригэр «Бичик» кыһа «Чээтиин!» сериянан төрөппүттэргэ, эбээлэргэ-эһээлэргэ бэртээхэй кинигэлэри таһаарда.

 

Киһи ытыһын саҕа халыҥ хордуоҥҥа «Ахсаан» диэн кинигэ хас биирдии сирэйин аайы икки чыычаах, үс кинигэ, биэс балык диэн сыыппара уонна чаҕылхай ойуу оҕо 10 иһинэн ахсааны билэригэр көмөлөһөр. Ийэ оҕотун кытта кинигэ сирэйин арыйа-арыйа кырачааҥҥа бу алта чааскы, сэттэ сибэкки, уон мээчик диэн сыыппараны уонна ойууну көрдөрөн кэпсээтэҕинэ, оҕо өйүгэр түргэнник хатыа.         


 

Эмиэ ити курдук кыра оҕо кинигэ илиистэрин сатаан алдьаппат гына халыҥ хордуоҥҥа «Өҥ-дьүһүн» диэн кинигэ оҕо өҥү араара үөрэнэригэр күүс-көмө буолар. Холобур, маҥан куба, кыһыл дьэдьэн, саһархай чоппууска диэн төрөппүт оҕотугар кинигэ илиистэрин арыйталаан кэпсиэн, ойуутун көрдөрүөн сөп. Оччоҕуна кырачаан киһи өҥү-дьүһүнү дөбөҥнүк араара үөрэниэ.  


 

Елизавета МАНДАРОВА «Ааҕабын-оонньуубун» лото-кинигэтэ таҥыллыбыт буукубалары холбоон, бүтэй, кылгас, уһун аһаҕас дорҕооннору араартаан, сүһүөхтэри холбоон, тыл таһааран, ааҕарга үөрэтэр. Бу кинигэ атыттарга олох майгыннаабат, ураты атын оҥоһуулаах, ол курдук, оҕону оонньото, буукубалары арыйталаан, лотуолуу таарыйа, ааҕарга уһуйуо. Сорох оҕону сүүрэ-көтө сырыттаҕына аахтарар, кини болҕомтотун тардар уустук соҕус буолааччы, маннык түгэҥҥэ кинини лотуонан интэриэһиргэтэн, оонньото таарыйа ааҕыы абылаҥар киллэриэххэ сөп. Мантан тирэх ылан, оҕо элбэх остуоруйаны, кэпсээни ааҕан, билиилээх-көрүүлээх киһи буола улаатыа.   


 

  «Күнчээн» диэн альбом курдук улахан кээмэйдээх кинигэ хайа баҕарар оскуолаҕа киириэн иннинээҕи саастаах оҕоҕо үөрүүлээх күндү бэлэх буолуо. Төрөппүт оҕотун кытта дьарыктанарыгар ыйдарынан күнү-дьылы билиһиннэрэргэ, сыыппараны үөрэтэргэ, уруһуйдуурга, пластилинынан, йогурт хаатынан онтон да атын дьиэҕэ баар тэрилтэн илиинэн араас оҥоһук оҥорорго бу кинигэ сүрүн тирэх буолуо. Бу кинигэҕэ оҕо бэйэтин, ийэтин-аҕатын аатын суруйан, хаартыскатын сыһыаран, сыыппараны суруйарга, сурукка эрчиллиэ, айымньыны истэн, кэпсииргэ холонуо. Былыр сахалар ыйдары тоҕо кулун тутар, муус устар диэбиттэрин бу кинигэттэн ааҕан билиэххит. Холобур, маҥнайгы сааскы ый төрөөрү сылдьар биэлэртэн кулуннарын араараллара, ол иһин бу ыйы кулун тутар диэн ааттаабыттара. Онтон биһиги өбүгэлэрбит балаҕаннарыттан муус түннүктэрин усталлара. Ол иһин муус устар ый диэн ааттаабыттар. Бу кинигэни ааҕан, туһанан, улахан да киһи элбэҕи билиэ-көрүө, оҕотун кытта бириэмэтин туһалаахтык, көдьүүстээхтик атаарыа.


 

«Саха бэргэн тыла-өһө» кинигэҕэ киирбит холобурдарга сахабыт тыла хайдахтаах курдук баайа, дириҥэ, кэрэтэ көстөр. Ааптар саха норуота сүүһүнэн сылларга муспут өркөн өйүн, философиятын, айылҕаҕа, киһи-аймахха сыһыанын, ымыылаабыт ыра санаатын барытын тылыгар-өһүгэр, норуот тылынан уус-уран айымньытыгар илдьэ сылдьарын туһунан ааҕааччыга тиэрдэр. Бу кинигэҕэ уостубат үрэх курааҥҥа, үчүгэй доҕор алдьархайга биллэр диэбит курдук өс хоһоонун арааһа киирдэ. Чолбон сулуһунан суолгун булун, өс хоһоонунан өйгүн тобулун.


 

«Саха суруйааччылара оҕолорго» сериянан Улуу Кыайыы 70 сылын көрсө талааннаах фронтовик-суруйааччы Тимофей Сметанин төрөөбүтэ 95 сылыгар «Егор Чээрин», «Мэхээлэчээн булчут кэпсээннэрэ» онтон да атын мүччүргэннээх айымньыларын хомуурунньуга таҕыста. Төбөбөр кус сымыыттаабыта, эһэни миинэн турардаахпын диэн эмиэ да омуннаах, эмиэ да көр-күлүү, көрүдьүөс аҥаардаах умсугутуулаах кэпсээннэри үгүс көлүөнэ оҕо оскуолаҕа ааҕан улааппыта. Аны билигин үүнэр көлүөнэ аахтын диэн орто саастаах оскуола оҕолоругар бэртээхэй кинигэ таҕыста.    


 

  «Бииргэ ааҕабыт» сериянан «Аартык» диэн алын кылаас оҕолоругар анаммыт кинигэҕэ араас суруйааччылар хоһоонноро, кэпсээннэрэ, тылбаас айымньылар киирдилэр. Бу кинигэҕэ кыра оҕо ааҕарыгар сөп гына буукубалар улахан шрибынан суруллубуттар. Үтүө майгыҥ – көтөр кынатыҥ, сааскы сайаҕас салгынынан сайа тыынар кэрэтиэн диэн түһүмэхтэринэн Семен Данилов, Николай Якутскай, Суорун Омоллоон онтон да атын саха суруйааччыларын тэттик айымньылара оҕону төрөөбүт литература алыптаах кэрэ эйгэтигэр сиэтэн киллэрэр.   

 

Кистэл буолбатах, хайа баҕарар төрөппүт күҥҥэ көрбүт күөрэгэйигэр, маанылаах оҕотугар ас саамай амтаннааҕын, таҥас талбатын, үөрэх үчүгэйин биэрэ сатыыр дьүккүөрдээх. Эмиэ ити курдук, «Бичик» кинигэ кыһата саҥа тылламмыт оҕоттон саҕалаан, саастарынан араартаан, олох улаатыар диэри кинигэ саамай интэриэһинэйин, аныгы оҕо болҕомтотун тардар гына ураты саҥа оҥоһуулааҕын, чаҕылхайын оҥорон таһаарар. Онон, күндү төрөппүттэр, эбээлэр-эһээлэр оҕоҕутун үөрэхтээх, үчүгэй үлэлээх гына иитэн таһаарыаххытын баҕарар буоллаххытына, билиҥҥэттэн дьарыктааҥ, «Бичик» кинигэлэрин аахтарыҥ, оҕоҕут билиитин кэҥэтиҥ!   

Источник:  Марианна ТЫРТЫКОВА.
4.jpg - Мирнинский район В 2023 году на территории Якутия зарегистрировано 123 дорожно-транспортных происшествия с участием несовершеннолетних, в результате которых 1 ребенок погиб, 139 детей получили травмы.
Мирнинский район
Спасатели выехали на участки возможного схода снежных лавин - ИА SakhaLife.Ru Спасатели аэромобильного поисково-спасательного подразделения Службы спасения республики 28 марта выехали из Якутска в Томпонский район для обеспечения безопасности на участках возможного схода снежных масс.
ИА SakhaLife.Ru
В медицинскую часть исправительной колонии № 1 поступило новое медицинское оборудование - УФСИН России по Республике Саха (Якутия) В рамках модернизации филиалов медико-санитарной части № 14 ФСИН России, расположенных в исправительных учреждениях УФСИН России по Республике Саха (Якутия),
УФСИН России по Республике Саха (Якутия)