“Кыайыыга - сүүрүүнэн!” девизтээх Аҕа дойду сэриитигэр Улуу Кыайыы 80, Ийэ Дойдуну көмүскүүр уонна Аҕа дойдуну көмүскээччилэр сылларыгар анаммыт, партиротическай иитиигэ туһуламмыт чэпчэки атлетика эстафетата
быйыл ыам ыйын 8 күнүгэр, күнүс 11 чаастан, ааспыт сылларга Ленин болуоссатыттан саҕалыыр эбит буоллахтарына, быйыл “Доҕордоһуу болуоссатыгар” саҕаланна. 24 хамаанда 400-кэ кыттыылаахтарын Саха Өрөспүүбүлүкэтин физическэй культураҕа уонна спорка миниистирин 1-кы солбуйааччы Гаврил Мохначевскай, “Сахамедиа” ген.дириэктэрэ Дмитрий Колесов, марафоҥҥа Россия биэс төгүллээх чөмпүйүөҥкэтэ Сардаана Трофимова эҕэрдэлээтилэр. Сүрүн судьуйанан 1 № оҕо спорт оскуолатын тренерэ Сергей Гуляев үлэлээтэ . Күннээх, ыраас халлааннаах күн-дьыл туран биэрдэ.
Пандемия кэнниттэн уһун тохтобул кэнниттэн Дьокуускай куорат үөрэҕин Управлениетын быһаарыытынан “Кыайыы эстафетата” 78-ыс төгүлүн тэриллэн ыытылынна. 200-800 миэтэрэ дистанцияларга сүүрдүлэр. Мэлдьитин көрө үөрэммит ааспыт сылларбытыттан кылгатыллыбыт. Оскуола үөрэнээччилэригэр 18 хамаанда стаартаата. Ленин проспегын устун Орджоникидзе болуоссатыгар диэри уон этааптарга хайдыһан 4200 м сүүрдүлэр. Син эмиэ ааспыт сылларга курдук, 31-ис, 33-үс орто оскуолалар бастакынан, иккиһинэн түмүктээтилэр, 23-үс оскуола үһүс бириистээх миэстэҕэ тигистэ.
Утарсааччыларын балачча тэйиччи хааллартаан XI кылааска үөрэнэр Илья Сивцев эстафетаны бастакынан түмүктээтэ: “Волейболунан, сүүрүүнэн дьарыктанабын. Чаҕылхай күннээх сылаас күн-дьыл сүүрэргэ олус үчүгэй, чэпчэки. Хамаанда туһугар туох-баарбынан сүүрдүм. Мин бүтэһик этаапка сүүрэммин, доҕотторум дистанция былаһын тухары бастакынан сылдьан аҕалбыт эстафета маһын ыламмын кыайдыбыт. Хамаанданы физкультурабыт учуутала Георгий Анатольевич бэлэмнээтэ. Питер, эбэтэр Казань университеттэригэр туттарсар санаалаахпын. Бары ситиһиилээх буолуҥ!”.
Үрдүк оунна орто-анал үөрэх кыһаларыгар университеттар бастаатылар. Тутуу инженерин идэтин баһылаары сылдьар Нам ыччата Кирилл Романов кыайыыларын кытта үөрэ-көтө үллэһиннэ: “Мин бүтэһигинэн сүүрбүт буоламмын кыайарбыт эрдэттэн биллибитэ. Бары үчүгэйдик сүүрдүбүт. Хамаанданы сүүмэрдээһин эрдэ буолбута. Бары сүүрүктэр. Бэйэ-бэйэбитин үчүгэйдик билсибэппит даҕаны. Өрөспүүбүлүкэ призера Ильин Евгений бааллар, түһэн биэрбэтилэр. Хамаанданы Арина Ильинична Югова дьарыктаата. Саха многоборьетынан дьарыктанабын, онно сүүрүү баар. Дипломнайбын суруйа сылдьабын.
Үлэ кэлэктииптэригэр биэс хамаандаттан Россгвардия байыастарыттан, тренердэртэн сүүмэрдэммит “Бегомир” спорткулууба, “Динамолар”, үөрэх үлэһиттэрин профсойууһа биэтэккэ бастакынан, иккиһинэн, үсүһүнэн кэлитэлээтилэр.
“Бегомир” хамаандаттан бириистээх 1-кы этаап кыайыылааҕа Айтал Ощепков 5000 солк наҕараадаланна. Бастаабыт хамаандалар кубоктарынан, дипломнарынан, өйдөбүнньүк мэтээллэринэн, туһааннааҕынан, 80, 50, 30 тыһ.солк сертификаттарынан биһирэннилэр.
Кыайыылаах университет хамаандатын салайааччыта, физкультура уонна спорт институтун дириэктэрэ Николай Ефимович Гоголев : “Хамаанданы кытта күүстээх үлэ түмүгэ. Университет студеннар спортарын улаханнык өйүүр. Россияҕа, аан дойдуга кыайар, миэстэлэһэр спортсменнардаахпыт. Ситиһиибитин Каыйыы 80 сылыгар аныыбыт. Икки хамаанданы туруордубут. Бэркэ сүүрдүлэр, университеты ааттаттылар. Дистанциятын кыайбыт Яна Бережицкая : “Төрдүс этаапка сүүрбүтүм. Дистанцияҕа ыарахан этэ. Кыһалла сатаатым. Эстафета маһын бастакынан тиэрдэммин сүүрүүбүттэн астынным. Сүүрүүнэн иккис сылбын Арина Ильнична Юговаҕа дьарыктанабын”.
Хамаанда тренерэ Арина Югова : “Станислав Саввинов, Яна Бережицкая, Гаврил Ефимов, Саина Иванова, Данил Федоров, бастакы этаабы баһыйтаран бараммыт, кэлин үчүгэйдик үлэлээммит, Кирилл Романов бастакынан түмүктээтэ. Хамаанданы эҕэрдэлиибин, олус үөрдүм, сүүрүүнэн дьарыктаныҥ!”.
Уһун сиргэ сүүрүүлэргэ уонна марафоҥҥа өрөспүүбүлүкэ элбэх төгүллээх чөмпүйүөнэ, рекордсмена, номоххо киирбит ССРС спордун бастакы маастара, Россия, аан дойду чөмпүйүөннэрин тренерэ Артур Егорович Феофанов санаатын кытта үллэһиннэ: “Бастатан туран эттэххэ, бу Аҕа дойду Улуу сэриитигэр кыайыыга ананан оҥоһуллубут эстафета. Үтүө үгэскэ кубулутуллан сыл аайы ыытыллар. Бу эстафеталарга элбэхтик сүүрбүтүм. “Социалистическая Якутия” хаһыат бирииһигэр бастакы этаапка 1100 м сүүрэр этим, куруутун бастыырым. Оччолорго эстафета 14 этааптаах буолар этэ. Аҕыс эр дьон, аҕыс дьахталлар сүүрэллэрэ. Кыайыыны бастакы этаап быһаарара. Уһун дистанциялар элбэх буолаллара. Бэлэмэ суох киһи кыайан сүүрбэт. Үчүгэй бэлэмнээх сүүрэллэрэ, кытаанах эрийсиилэр буолаллара. Педфагы бүтэрэммин 5-ис оскуолаҕа учууталлаабытым, үс сыл үлэлээн бараммын университекка физкультураҕа преподавателлээбитим. Кэлин, иитиллээччим Александр Бугаев хаста даҕаны бастыы сылдьыбыта. Бэйэбин кытта эмиэ тэбис-тэҥҥэ сүүрэн турар. Билигин Спорка солбугу бэлэмниир Киин дириэктэринэн үлэлиир. Оҕолор, ыччаттар сүүрүүнэн утумнаахтык дьарыктанан чэгиэн туруктаах буолалларыгар баҕарабын!”.
Үтүө үгэскэ кубулутуллан сыллата ыытыллар чэпчэки атлетикаҕа Кыайыы эстафетата өрө күүрүүлээхтик, бырааһынньыктыы быһыыга-майгыга ааста.
Баһылай Посельскай
