КЫАЙЫЫ ПРОГРАММАТА

Аас-туор олохтон – сайдыыга уонна кырдьыкка КПРФ кризистэн, дьадайыыттан, бобуу-хаайыы иититтэн тахсыыны мэктиэлиир РОССИЯ УОННА ЭН ОЛОҔУҤ ХАЙДАХ УЛАРЫЙЫАҔАЙ? Халабыры, батталы, аас-туор олоҕу тохтотуохха, түксү! Толору тыыныахха, киһилии олоруохха, сайдыахха! “Бигэ олох – улуу сыаннаспыт, онон муҥурданыҥ,” – диир былаас пропагандата. Ити эрээри бигэ дьадайыы – бу сытыйыы. Сыана бигэтик үрдээһинэ – бу ойдуу-быстыы. Бигэ туруктаах хоруупсуйа – кэскили таҥнарыы. КПРФ бигэргэтэр: иннибит диэки хардыы – социализм! Бары биири судургутук өйдүөх тустаахпыт: социальнай-экэнэмиичэскэй кууруһу уларыппакка эрэ фроҥҥа кыайыыны чиҥэтэр кыаллыбат. Олоҕу тутар уларыйыылары ыыппатахха, террористары самнарар, дьоллоох сарсыҥҥыны тутар кыаллыбат. Биитэр биһиги куттал суох буолуутун хааччыйабыт, биитэр Европаҕа ситэри кыргыллыбатах фашистар, Киевкэ баар наркоман бандеровецтар бэйэлэрин бэрээдэктэрин биһиэхэ соҥнуохтара. Биһиги эйэлээх, дьоһун суолталаах, кэскиллээх уларыйыылардаах этиилэри көтөҕөбүт. Кыайыы программата – бу көннөрү үтүө баҕа санаалары түмүү буолбатах. Бу чопчу суоттаммыт-ааҕыллыбыт хас биирдии хардыы, хас биирдии солкуобай, хас биирдии дьаһал. Кырдьыкка, чөлгө түһүүгэ тиэрдэр 10 хардыы. Кыайыы Программата эһиэхэ тугу биэриэхтээҕин билэр бырааптааххыт. Ааҕыҥ, толкуйдааҥ, сыта-тура ырыҥалаан көрүҥ. 1 ХАРДЫЫ. СЫАНА, ИЭС-КҮҮС УОННА ТАРЫЫП ҮРДҮҮ ТУРАРЫН ТОХТОТУОХПУТ Күн ахсын килиэп, үүт сыаната үүнэ-тэһиинэ суох үрдүүрүттэн салҕан бардыгыт? Кыбартыыра ыйдааҕы төлөбүрэ үрдүү турарыттан сылайдыгыт? Биһиги ону тохтотуохпут! ДЬОН ТУҺУГАР. Тыын суолталаах табаар, ас-үөл, эмп-том, оҕолорго аналлаах табаар сыанатын судаарыстыба сүрүннүөҕэ. Ханнык да үспүкүлээннэһин суох буолуо! Килиэп, үүт, эт, хортуоппуй сыаната 300 бырыһыаҥҥа тиийэ үрдүүрүн тохтотуохпут! Ас-үөл атыыга тахсыар диэри үс төгүл үрдүө суохтаах! ДЬИЭ КЭРГЭН БҮДДЬҮӨТҮГЭР. НДС түһүмэҕинэн тохтотуллуоҕа. Маҕаһыыҥҥа хас биирдии атыылаһыы 10-20 бырыһыан чэпчиэҕэ. Бу ый ахсын тыһыынчанан үбү кэмчилиэҕэ. ХАС БИИРДИИБИТИГЭР. ОДьКХ төлөбүрэ дьиэ кэргэн дохуотун 10 бырыһыанын куоһарыа суоҕа. Эһиги 20-лии тыһыынчаны төлүүгүт дуо? Өскөтүн ыал дохуота 50 тыһыынча буоллаҕына, 5 тыһыынчаҕа диэри төлүөххүт. Өскөтүн 120 тыһыынча буоллаҕына, 12 тыһыынчаттан кыраны төлүөххүт. Ордугун судаарыстыба субсидията уйунуоҕа. КЫРА ДОХУОТТААХТАРГА. Иэстэрин-күүстэрин кыайан төлөөбөтөх дьону собус-соҕотох дьиэлэриттэн үүрэн таһаарары КПРФ бобуоҕа. Ким да уулуссаҕа хаалыа суоҕа. ИЭСТЭЭХТЭРГЭ УОННА ИПОТЕКАЛААХТАРГА. Биһиги баан буолбакка, дьон диэкибит. Куортамҥа бэриллэр дьиэ программатын киллэриэхпит – хабалаҕа ылар ипотека тохтуоҕа. Элбэх оҕолоохторго – оҕо төрөөтөҕүн ахсын иэс күүс кыччатыллан иһиэҕэ. Үһүс оҕо төрөөтөҕүнэ – иэс толору кээмэйинэн сотуллуоҕа! 2 ХАРДЫЫ. КУОРАТТАРГА УОННА СЭЛИЭННЬЭЛЭРГЭ – ҮЛЭ МИЭСТЭЛЭРИН УОННА САЙДЫЫНЫ Кый ыраах вахтанан үлэлииртэн сылайдыгыт? Дьиэҕитигэр олоруоххутун, чугас үлэлиэххитин баҕараҕыт? Биһиги собуоттары уонна фабрикалары Россия регионнарыгар төннөрүөхпүт! ДЬОҔУС КУОРАТТАР ОЛОХТООХТОРУГАР. Куораты үөскэтэр предприятиелар сабыллалларын тохтотуохпут. Стратегическай суолталаах салаалар судаарыстыба хонтуруолугар төннүөхтэрэ. Кыһалҕаттан сылтаан дьиэ кэргэнтэн тэйэн ыраах үлэлии барарга күһэллиэххит суоҕа. Дьоһун хамнастаах үлэ дьиэҕит аттыгар баар буолуо. ТЫА СИРИН ОЛОХТООХТОРУГАР. Тыа сирэ сөбүгэр сыаналаах оттугунан хааччыллыаҕа. Дизель уонна бензин сыаната 30% чэпчиэҕэ. Ньиэби таска таһаарыыга пошлинаны киллэриэхпит. Ыһыы үлэтин кэмигэр тыа хаһаайыстыбатын производствота мөлүйүөнү кэмчилиэҕэ. Тыа хаһаайыстыбатын үбүлээһин түөрт төгүл үрдүөҕэ. ОРОБУОЧАЙДАРГА. Муҥутуур кыра хамнас 45 тыһыынча солкуобайтан кыра буолуо суохтаах. 15-20 тыһыынча солк. хамнас – быстар дьадаҥы олох. 2030 сылга – Россияҕа 200 тыһыынчаттан кыра дохуоттаах ыал хаалыа суохтаах! ФЕРМЕРДЭРГЭ. Быраҕыллыбыт сирдэри эргииргэ төннөрүү. 25% буолбакка, 3-4 % кредити биэриэхпит. Нолуокка каникулу туттуохпут. Кооперативтар судаарыстыба үгүс өрүттээх көмүскэлин ылыахтара. 3 ХАРДЫЫ. УМНАҺЫККА ТЭҤНЭЭХ БУОЛБАККА, СИЭРДЭЭХ ПЕНСИЯ Пенсияҕа тахсар сааһы уларытан эһигини албыннаатылар? Үлэлиир пенсионердарга индексацияны тохтоттулар? Биһиги барытын чөлгө түһэриэхпит! НЭҺИЛИЭННЬЭҔЭ БАРЫТЫГАР. Наукаҕа тирэҕирэн олохтоммут пенсияҕа тахсар сиэрдээх саас: эр дьоҥҥо – 60, дьахталларга — 55. Пенсияҕа тахсар саас тыытыллыбат! ПЕНСИЯЛААХТАРГА. Пенсия кээмэйэ дойдуга орто хамнас кээмэйин 50% диэри улаатыаҕа. Өскөтүн орто хамнас 120 тыһыынча солкуобай буоллаҕына, пенсия кээмэйэ 60 тыһыынчаттан итэҕэс буолуо суохтаах. 2-3 төгүл улаатыаҕа! Мунньуу пенсияны толору кээмэйинэн төннөрүөхпүт. ҮЛЭЛИИР ПЕНСИОНЕРДАРГА. Пенсия кээмэйэ толору индексацияланар буолуоҕа. Пенсияны “тоҥорууну” тохтотуохпут. Бырабыыталыстыба ситэ төлөөбөтөҕүн барытын төлөтүөхпүт. “СЭРИИ ОҔОЛОРУГАР”. Дьоһун төлөбүрдэр уонна чэпчэтиилэр тустарынан федеральнай сокуону ылыахпыт. Судаарыстыба бэйэтин гражданнара оҥорбут хорсун быһыыларын умнуо суохтаах! ССРС СБЕРБААНЫН УУРУНУУЛААХТАРЫГАР. 90-с сылларга уоруллубут харчыны төннөрөргө уолдьаста. 10 сыл устатыгар судаарыстыба эһигини кытта толору төлөһүөҕэ. Сокуоннас уонна кырдьыгы туруулаһыы боппуруоһа быһаарыллыаҕа. ТЫА СИРИН ПЕНСИЯЛААХТАРЫГАР. Тыа сиригэр 30 сыл уонна онтон уһуннук үлэлээбиттэргэ надбавка мэктиэлэниэ. Судаарыстыба көмөлтө хаһаайыстыбалары уонна саады-оҕуруоту көрөөччүлэр табаарыстыбаларын өйүөҕэ. АҔАМ СААСТААХТАРГА. 40 тыһыынча солкуобай кээмэйдээх пенсиялаах киһи коммуналкаҕа 2 тыһыынчаттан элбэҕи төлүө суоҕа. Атына – субсидияланыа. 70 саастарын ааспыттар хапытаалынай өрөмүөн усунуоһуттан босхолонуохтара. Баһаам үп кэмчилэниэҕэ. 4 ХАРДЫЫ. ДОРУОБУЙАНЫ АТЫЫЛАҺАН ЫЛБАККЫН. МЕДИЦИНЭ – ӨҤӨ ЫРЫЫНАГА БУОЛБАТАХ Эмкэ харчыгыт суох? Бырааска барартан толлоҕут? Медицинскэй страховка тиһигэ тууйар? ДОРУОБУЙАЛАРЫН КӨРҮНЭЭЧЧИЛЭРГЭ. Страховкаһыттары тохтотон, медицинэни судаарыстыба быһаччы үбүлүүр механизмын төннөрүөхпүт. Балыыһаларга уонна поликлиникаларга босхо эмтиэхтэрэ. Чааһынай медицинэ баҕалаахтарга үлэлиэҕэ. БЫРААСТАРГА. Медиктэр хамнастара биллэрдик үрдүөҕэ. Ону тарыып биир кэлим сетката быһаарыаҕа. Соло акылаатын муҥутуур кыра ыстаапката айах ииттинэн олорор кээмэйтэн намыһах буолуо суоҕа. Доруобуйа харыстабылын үбүлээһин үс төгүл үрдүөҕэ. Балыыһаларга саҥа оборудование туруоруллуоҕа. Дьаарай бүрүкүрээтийэттэн быраастары босхолуохпут. БОСХО ЭМП-ТОМ. Тыын суолталаах эми-тому – судаарыстыба суотугар. Эпэрээссийэҕэ ким да харчыны умналыырга күһэллиэ суоҕа. Ону судаарыстыба бүддьүөтэ уйунуоҕа. БАРЫБЫТЫГАР УОННА ХАС БИИРДИИБИТИГЭР. Физкультуранан уонна спордунан ким барыта дьарыктанар кыахтаныаҕа. Спорт тэлгэһэлэргэ төннүөҕэ. Спорт саалалара, бассейннар, стадионнар, спорт оскуолалара дьиэттэн чугас, ону тэҥэ ханнык баҕарар ыал уйунар сыаналаах буолуохтара. 5 ХАРДЫЫ. ТӨЛӨБҮРЭ СУОХ ҮӨРЭХ. ӨЙДӨӨХ ОМУК – САЙДЫЫЛААХ ДОЙДУ Бүтэһик харчыгытын куруһуоктарга биэрэҕит? Репетитордарга үбү барыыгыт? “Баҕа өттүгүтүнэн” оскуолаҕа усунуос төлүүгүт? Маны тохтоторго уолдьаста! Төрөппүттэргэ. Икки оҕото оскуоланаҕа үөрэнэр ыал аһылыкка, куруһуокка уонна репетиторга ыйга 15-20 тыһыынчаттан тахса солкуобайы барыыр. Биһиги саҥа быраабылабытынан 1 да солкуобайы төлүө суоҕа. Искусство оскуолаларыгар уонна спорт секцияларыгар баҕалаах барыта дьарыктаныаҕа. Өрөмүөҥҥэ, түннүк сабыытыгар, ЕГЭ-ҕэ бэлэмнэниигэ харчыны хомуйуу туһунан умнуоххут. Ордук улахан болҕомто элбэх оҕолоохторго ууруллуоҕа. ОСКУОЛА ҮӨРЭНЭЭЧЧИЛЭРИГЭР. Оҕо дьылҕатын төрөппүт хармаана буолбакка, кини талаана, кыһамньыта быһаарыахтаах. Оскуолаларга итии аһылык – бу оҕо доруобуйата, дьиэ кэргэн бүддьүөтүн кэмчилээһин. СТУДЕННАРГА УОННА АСПИРАННАРГА. Стипендия айах ииттинэн олоруу алын кээмэйиттэн намыһах буолуо суохтаах. Үөрэнэҕин, ол аата түүннэри үлэлиэхтээх буолбатаххын. Эдэр саас – билиини сомсорго, науканан дьарыктанарга ордук табыгастаах кэм! УЧУУТАЛЛАРГА УОННА ПРЕПОДАВАТЕЛЛЭРГЭ. Регионнарга хамнас кээмэйин тарыып биир кэлим сетката быһаарыаҕа. Соло муҥутуур кыра акылаата айах ииттинэн олорор кээмэйтэн намыһах буолуо суоҕа. Быстар намыһах ыстаапка уонна бүрүкүрээтийэ умнуллуоҕа. Үөрэххэ икки төгүл элбэх үп көрүллэр буолуоҕа. УЧУОНАЙДАРГА. Үөрэхтээх исписэлиистэр тас дойдуларга көһөн барыыларын тохтотуохпут. Наука судаарыстыба тумус суолталаах хайысхатынан буолуоҕа. КУЛТУУРА ҮЛЭҺИТТЭРИГЭР. Култуура анала – иитии уонна сырдатыы. Россияҕа толору кээмэйдээх култуурунай олох ирдэнэр. Театрдарга, музейдарга, библиотекаларга, норуот айымньытын дьиэлэригэр, искусство оскуолаларыгар – өрөмүөнү уонна аныгы кэм ирдэбилигэр сөп түбэһэр хааччыллыыны. Култуура үлэһиттэригэр – дьоһун хамнаһы. 6 ХАРДЫЫ. РОССИЯ БААЙЫН НОРУОККА ТӨННӨРӨРГӨ Ойуур, гаас, ньиэп, металлар – биһиги уопсай баайбыт буоларын билэҕит дуо? Ити эрээри олигархтар эрэ туһаналлар, сыта байаллар. Айылҕа баайын туһаҕа таһаарыыттан киирэр барыс офшорга хаалар. Биһиги ону тохтотуохпут! ГРАЖДАННАР ТУҺАЛАРЫГАР. Экэниэмикэ тутаах салааларын судаарыстыба бас билиитигэр төннөрүөхпүт. Сиртэн хостонор баай, энергетикэ, тырааныспар, ситими үөскэтэр бааннар норуот бүттүүнүн баайа буолуоҕа. Айылҕа баайын рентата баайдарга буолбакка, бүддьүөккэ киириэ. ОЛИГАРХТАРА СУОХ ДОЙДУ. Яхталары, дыбарыастары атыылаһа үөрэммит баайдар дьиэ кэргэннэрэ эрэ буолбакка, нэһилиэнньэ барыта барыс аахсыаҕа. Олигархтар ырайдааҕы олохторо тохтуоҕа. Ньиэптэн уонна гаастан киирэр дохуот пенсияҕа, балыыһаларга, оскуолаларга, суолу оҥорууга барыаҕа. СУДААРЫСТЫБАНЫ БЫЛААННААҺЫН. Ыһыллы-тоҕуллуу, барыһы эккирэтии сыанан аҕаабат. Дойдуну сайыннарыы былаана баар буолуохтаах. Бэтилиэккэлэр ССРС ситиһиилэрин хааччыйбыттара, Кытай сүҥкэн сайдыытын түстээбиттэрэ. Судаарыстыба тугу тутуохтааҕын, төһөнү оҥорон таһаарыахтааҕын, харчытын ханна угуохтааҕын булгуччу билиэхтээх. Россия кэхтибэккэ, иннин диэки хардыылыахтаах. 7 ХАРДЫЫ. БААННАР ТҮӨКҮННҮҮР БУОЛБАККА, ДОЙДУНУ САЙЫННАРАР АНАЛЛААХТАР Киин баан 15 уонна онтон улахан бырыһыаннаах ыстаапката оҥорон таһаарыыны тууйбута, ипотеканы үүнэ-тэһиинэ суох үлүннэрбитэ. Маннык быһыыны-майгыны суһаллык көннөрүөх тустаахпыт. Экэниэмикэни сайыннарыы Киин баан соругунан буолуохтаах. Киин баан үлэтин Россия Президенин быһаччы эппиэтинэһигэр киллэрэргэ уолдьаста. БЫРАМЫЫСЫЛАННАС УОННА ТЫА СИРЭ. Оҥорон таһаарыыга кыра бырыһыаннаах уһун болдьохтоох харчы ирдэнэр. Тастан киллэриини солбуйуу уонна саҥардан биэрии дьыалатыгар төһүү буолуоҕа. Собуоттар оборудованиеларын саҥардыахтара, аграрийдар техникэни уонна уоҕурдууну атыылаһыахтара. ДЬОҔУС УОННА ОРТО БИЗНЕС. Бу эйгэҕэ кредит 25-30 % оннугар 3-4 % буолуоҕа. Эһиги бааннары байытар оннугар, оҥорон таһаарыыны сайыннарыаххыт. ҮЛЭҺИТ ДЬОҤҤО. Биһиги саҥа үлэ миэстэлэрин таһаарыахпыт, сыахтары уонна собуоттары уларыта тутуохпут. Хамнас уонна социальнай төлөбүр улаатыаҕа. БАРЫБЫТЫГАР. Оҥорон таһаарааччы бааҥҥа кредити 25% ыстаапканан ылар буоллаҕына, табаар сыаната доруоһа курдук үллэр. Оттон 3-4 % ыстаапкаҕа үүт, эт, килиэп уонна таҥас-сап сыаната биллэрдик чэпчиэҕэ. 8 ХАРДЫЫ. НОЛУОК ЫАР БАТТЫГЫН ДЬАДАҤЫЛАРГА БУОЛБАККА – БААЙДАРГА Оннооҕор анал байыаннай дьайыы кэмигэр олигархтар баайдарын салгыы хаҥаталлар. Нолуок прогрессивнай шкалата – булгуччулаах уонна сиэрдээх! КЫРА ДОХУОТТААХ ЫАЛЛАРГА. Хамнас икки алын кээмэйиттэн намыһах хамнастаахтары барыларын дохуокка нолуоктан босхолуурга уолдьаста. Ол түмүгэр дьиэ кэргэн бүддьүөтүгэр ыйга 5 тыһыынча уонна онтон элбэх солкуобайы хаалларар кыахтаныахпыт. НОЛУОГУ ТӨЛӨӨЧЧҮЛЭРГЭ. Нолуок тиһигэ Россия гражданнарыгар дьэҥкэтик көстөр уонна барыбытыгар өйдөнөр буолуохтаах. Ханнык да кистэммит хомуур уонна төлөбүр суох буолуохтаах. ОЛИГАРХТАРГА. Сыта байбыт дьоммут Россияҕа төлүүллэринээҕэр үс-түөрт төгүл элбэх сууманы атын дойдулар бүддьүөттэригэр биэрэллэр. АХШ-ка, Европаҕа, Кытайга прогрессивнай нолуогу тутталлар. Ол Россияҕа тоҕо суоҕуй? Неофашизмы уонна бандеровецтары хайдах самнарабыт? Үрдүк хамнаска уонна дивидеҥҥэ биһиги прогрессивнай нолуогу туттуохпут. Дыбарыаска, самолекка, яхтаҕа – дэлэгэй баайга нолуок эмиэ баар буолуоҕа. Испииргэ уонна табахха судаарыстыба монополиятын төннөрүөхпүт. ОҔОЛООХ ЫАЛЛАРГА. Биһиги оҕолоох ыалларга НДФЛ суһаллык тохтотору туруорсабыт. Ийэ хапытаалын хас биирдии оҕоҕо мэктиэлиэх тустаахпыт. 9 ХАРДЫЫ. ЦЕНЗУРАТА СУОХ ИНТЕРНЕТИ, ХОРУУПСУЙАТА СУОХ БЫЛААҺЫ Быыбар тиһигэр итэҕэйбэккит? Хоруупсуйаны утараҕыт? Интернети бобууттан сылайдыгыт? Мэлдьи туттар сервискит көмөтүнэн үлэлиир үлэҕитин уонна кэпсэтэр дьоҥҥутун, үөлээннээхтэргитин сүтэриэхпит диэн куттанаҕыт? КПРФ көнө сүрүннээх былаас иһин, биһиги бобууну-хаайыыны уонна эргиччи хонтуруолу утарабыт. ХАС БИИРДИИ БЫЫБАРДААЧЧЫГА. Биһиги чиэһинэй быыбары төннөрүөхпүт. Быһаарар оруолу эһиэхэ биэриэхпит. Ханнык да уруһуйдаммыт бырыһыаны, талбытынан дьаһайыыны уонна ыгыыны-түүрүүнү таһаарыахпыт суоҕа. Сымыйа бюллетеннэри, электроннай куоластааһыны кытта ситимнээх фокустары бохсуохпут. УОПСАСТЫБАҔА. Биһиги бириинсиппит: чунуобунньук – тойон буолбатах, норуот хамначчыта. Хоруупсуйаны кытта кимиилээхтик охсуһарга уолдьаста. Хааһына харчытын бачаачайдааччылары – баайдарын былдьаан туран түүнүктээх түрмэҕэ. БИҺИГИ ДОЙДУБУТУГАР. Ким барыта туһанар кыахтаах уонна куттала суох Интернет – олох ирдэбилэ, гражданнар былдьаныллыбат бырааптара. Судаарыстыба ону көмүскүүрэ эбээһинэстээх. Дьон туорайдартан уонна хааччаахтааһынтан эрэйдэниэ суохтаах. Суута суох блоктууру, сыыппараҕа быраабы хааччахтыыры тохтотуохха. ЫЧЧАККА УОННА ИСПИСЭЛИИСТЭРГЭ. Үөрэх, наука уонна сайдыы ХХI үйэҕэ информация түргэнник тарҕанарын ирдииллэр. Интернет уонна сыыппара платформаларын көмөтүнэн мөлүйүөнүнэн дьон үлэлииллэр, бизнестэрин сайыннараллар, өҥөлөрү ылаллар. Кинилэр үөрэнэллэригэр, үлэлииллэригэр, бэйэ бэйэлэрин кытта кэпсэтэллэригэр туорайдаһар табыллыбат. ГРАЖДАННАРГА. КПРФ интернет түөкүннэрин кытта кытаанах охсуһууну ыытары туруорсар. Кибертүөкүттэри уодьуганныахха уонна кытаанах эппиэккэ тардыахха. Судаарыстыбаттан гражданнары цензуралааһын уонна эргиччилээх кэтэбил оннугар, бигэ туруктаах сыыппара бастыҥ инфраструктурата ирдэнэр. БИЗНЕСКЭ. Ханнык да күһэйии, кыһарыйыы табыллыбат. Судаарыстыба атыылаһыылара барыта бар дьоҥҥо дьэҥкэ уонна өйдөнүмтүө буолуо. Сыыппара платформаларын сайыннарыы дьоҕус бизнес уонна дьиҥ оҥорон таһаарыы туһатыгар. 10 ХАРДЫЫ. САЙДЫЫ УОННА КУТТАЛ СУОХ БУОЛУУТУН БҮДДЬҮӨТЭ. КҮҮСТЭЭХ АРМИЯ – КЫАХТААХ ДОЙДУ Судаарыстыба дохуотун үүнүүтэ – бу хамнаһы үрдэтии уонна саҥа дьиэ-уот, бастыҥ собуоттар уонна модун армия, төлөбүрэ суох медицинэ уонна сайдыылаах спорт. Бу барыта – өйгө эрэ оҥорон көрүү буолбатах. Маны биһиги программабыт хааччыйыаҕа. Дьоһун суолталаах сокуоннар барыллара бэлэмнэннэ. ГРАЖДАННАРГА. Судаарыстыба дохуота сорунуулаахтык үүнүөҕэ. Судаарыстыба бүддьүөтүгэр эбии 32 триллион солкуобай киириэҕэ. Үп барыта социальнай программаларга, сайдыыга уонна национальнай куттал суох буолуутугар уталытыллыбакка ыытыллыаҕа. САЙДЫЫ БҮДДЬҮӨТЭ. Саҥа дохуот – бу технологическай үүнүү төрдө. Бу дойду үрдүнэн уонунан тыһыынча тутуу. Бу эһиги куораттаргытыгар уонна сэлиэнньэлэргитигэр саҥа суоллар, оскуолалар, балыыһалар. Бу робототехникэҕэ, авиацияҕа, космоска саҥа кирбиилэр. КУТТАЛ СУОХ БУОЛУУТУН ТУҺУГАР. Модун байыаннай-промышленнай комплекс Россия тутулуга суох буолуутун мэктиэлиир. Армия уонна флот бастыҥ сэби-сэбиргэли ылыахтара. Биһиги эписиэрдэр сулууспаларын үтүө аатын сорунуулаахтык көтөҕүөхпүт. БАЙЫАННАЙДАРГА, БЭТЭРЭЭННЭРГЭ, БАЙЫАННАЙ СУЛУУСПАЛААХТАР ДЬИЭ КЭРГЭННЭРИГЭР. Судаарыстыба Аҕа дойдуну көмүскээччилэргэ уонна кинилэр дьиэ кэргэннэригэр сөптөөх социальнай өйөбүлү хааччыйыаҕа. Чугас дьоннорун сүтэрбиттэр тэҥинэн икки пенсияны ылар бырааптаныахтара – бэйэлэрин уонна иитэр киһини сүтэрии иһин. КПРФ – ТАЛАРГА ТОҔО КЭСКИЛЛЭЭҔИЙ? Коммунистарга, Россия норуодунай-патриотическай күүстэригэр: 1. Олоҕу хайдах уларытары тобулар толкуй, өй-санаа баар. Биһиги тэтимнээхтик сайдыбыт дойдулар холобурдарыгар тирэҕирэбит. 30 сыл устатыгар ССРС экэниэмикэтэ сылга ортотунан 15% үүммүтэ. Социалистическай Кытай сөҕүмэр көрдөрүүлэри ситистэ. Былааҥҥа тирэҕирии кыахтаах экэниэмикэни уонна социальнай эппиэтинэһи ситимнииргэ булгуччулаах төһүү буолар. 2. Кыайыы программата баар. Сайдыы бүддьүөтэ уонна чопчу этиилэр – экэниэмикэҕэ уонна социальнай эйгэҕэ баар кыһалҕалары быһаарыыга дьоһун тирэх буолар. Бу программа наука, учуонай аймах өркөн өйүн сүһэн ылбыт. Бу салгыны хамсатыы буолбатах. Хас биирдии саҥа арыйыы, сокуон хас биирдии барыла солкуобайыгар тиийэ ааҕыллыбыт-суоттаммыт. Ол түмүгэр Россияны саҥа хайысханан – сайдыы туһаайыытынан эрэллээхтик сирдиэхпит. 3. Профессионаллар кэлэктииптэрэ баар. Биһиги кэккэбитигэр уопуттаах сокуону оҥорооччулар уонна губернатордар, байыаннайдар уонна учуонайдар, салайааччылар, норуот предприятиеларын салайааччылара бааллар. Коммунистар салалталарынан регионнар уонна үлэ кэлэктииптэрэ дьоһун кирбиилэри ыллылар. Биһиги хамаандабыт – бу патриоттар уонна суобас дьоно. Кинилэр кэлэктииби, региону, салаалары уонна дойдуну салайар толору кыахтаахтар. 4. Дьиҥ уопут, чопчу дьыала баар. КПРФ – бу бүддьүөт хас биирдии солкуобайын иһин чиэһинэй үлэ. Биһиги норуодунай предприятиеларбыт – бу бастыҥ оскуолалар уонна оҕо уһуйааннара. Биһиги муҥутуур көрдөрүүлэрбит – бу коммунистар салалталарынан регионнарга ылыллыбыт сөҕүмэр кээмэйдээх үүнүү. Биһиги кыайыыларбыт – бу спорт араас таһымнаах түһүлгэтигэр ситиһиилэр. КПРФ хамаандата профессионаллар мындыр толкуйдарын уонна саҥа көлүөнэ эрчимин дьүөрэлиир. Биһиги программабытын Норуот референдумун мөлүйүөнүнэн кыттыылаахтара өйөөтүлэр. 5. Биһиэхэ алҕас кэлбит дьон суох. Биһиэхэ модун санаа уонна көдьүүстээх былаан – иннибит диэки кыайыы көтөллөөх хардыы былаана баар. ЭН КУОЛАҺЫҤ БАРЫТЫН БЫҺААРАР! Тугу да кыайан уларытар кыахпыт суох диир дьоҥҥо итэҕэйимэҥ. Биһиги олохпутун бэйэбит эрэ уларытар кыахтаахпыт. Сомоҕолоһуубутунан, норуот модун санаатынан. Бэйэни тэриниитинэн уонна тус көҕүнэн. Эрэллээхтик, эйэлээхтик. Олорон кэлбит историябыт уонна буулаҕа санаабыт, эппиэтинэс уонна көдьүүстээх программа – барыта баар. Норуот баһыйар аҥаарын партиятын кытта буол! Иэһэ-күүһэ суох, кураанахсыйбыт дэриэбинэлэрэ суох, бобуута-хаайыыта суох олоҕу тал! Дьоһун үлэни, сиэрдээх пенсияны, төлөбүрэ суох доруобуйа харыстабылын туруулас! Социализмы тутуу уонна Аҕа дойдуну чөлгө түһэрии программатын тал! КЫАЙЫЫ ПРОГРАММАТА – БУ БИҺИГИ УЛУУ УОПСАЙ КЭСКИЛБИТ!