Оһуохайбыт үйэлэргэ симэлийбэтин! 

Оһуохайбыт үйэлэргэ симэлийбэтин! 
Оһуохайбыт үйэлэргэ симэлийбэтин! 
Оһуохайбыт үйэлэргэ симэлийбэтин! 
Фото: sakhalife.ru

          Оһуохай күнү көрсө Өрөспүүбүлүкэ араас муннугуттан төрүттээх этээччилэрбитин кытта билиһиннэрэр материалларбытын салҕыыбыт. 

          Бүгүн биһиги ыалдьыппыт — Саха Сирин Дархан этээччитэ Матрена Алексеевна Порядина — Күн Кыыһа:

      — Таатта улууһун Ытык — Күөл нэһилиэгэр 1986 сыл кулун тутар ый 3 күнүгэр күн сирин көрбүтүм. 

      Туора — Күөл орто оскуолатын бүтэрэн баран  Дьокуускайдааҕы култуура уонна ускуустуба коллеһыгар орто анал үөрэҕи бүтэрбитим, билигин Амма улууһун Абаҕа нэһилиэгэр ыал буолан олоробун, түөрт оҕолоохпун.

    Оһуохайга дьаныардаахтык 2012 сыллаахтан дьарыктанабын. 

        2012 сыллаахха сайын, бэс ыйын саҥата быһыылааҕа, Таатта улууһун Тыараһа нэһилиэгэр уопсай Оһуохай түһүлгэтэ буолбута, ол күнтэн Оһуохай тылын этиэх баҕа санаа үөскээн, онтон ыла этэр буолбутум. Араас күрэхтэргэ кыттабын, Оһуохай түмсүүгэ баарбын, Дархан этээччи буолабын. 

          Хас биир саха киһитэ бэйэтин төрүт уус — уран айымньытын билиэхтээх уонна онон дьарыктаныахтаах. Мин тус бэйэбэр Оһуохайым, сахам тылын сайыннарарга, сахалыы ыраастык саҥарарга, оҕолорбун сахаларын тылларын таптыы улааталларыгар уонна Урааҥхай удьуорун тыла сүппэтигэр төһүү күүс буолар. Оһуохай — тыл, үҥкүү, ырыа эрэ буолбатах, оһуохай санаа этинэргэ, кэрэни туойарга, доруобай чөл буоларга эмиэ улахан суолталаах дии саныыбын.

        Саамай өйдөөн хаалбыт түгэним Оһуохай түмсүүнү кытта ыкса билсэн, кинилэри кытта ыраах — чугас эҥэрдэргэ сылдьан, элбэҕи билиим буолар уонна биир түгэн саамай долгутуулаах, ол Сунтаар улууһун Түбэ түөлбэтигэр үөскээбит,  биир ытыктыыр, убаастыыр, убайым тэҥэ киһим Валентин Васильевич Хорунов — Дьэргэлгэн арай биир кыһын убаһа буутун Сунтаар курдук ыраах сиртэн анаан — минээн ыыппыт этэ, ол түгэн олох өйбүттэн сүппэт. Дьонум эмиэ тэбис тэҥҥэ үөрэн — көтөн билиҥҥээҥҥэ дылы саныыллар, Валентин Васильевиһы куруутун ыйыталлар. Ол курдук киһиэхэ санаатын ууран туран субу курдук өйөбүл, күүс — көмө буолаллара үйэлэргэ умнуллубат.

        Оһуохай түмсүү чэрчитинэн улуус, Өрөспүүбүлүкэ таһымнаах күрэхтэр, дьоҥҥо маастар кылаастар, араас бэсиэдэлэр ыытыллаллар. Түгэнинэн туһанан дьоммутун барытын көхтөөх кыттыыны ыларга ыҥырыам этэ! 

        Оҕо саастан ол эбэтэр уһуйаан саастарыттан үөрэтиллэн барыахтаах, Оһуохай айымньы, өй — санаа, дууһа, иэйии  сайдыыта, сахалыы киэн туттуун.

        Ол инниттэн алта, сэттэ саастаах оҕоттон саҕалаан, аҕыйахтыы устуруоканы суруйан биэрэн, көмөлөһөн, үтүгүннэрэ, этиттэрэ үөрэтэр  буоллар. Онтон аны орто сүһүөх оскуолаҕа улахан кылаастарга араас бастаан бэйэлэрин икки ардыларыгар күрэх иҥин оҥорор киһи син биир эмит оҕо Оһуохай тылын этэр буолан тахсыах этэ, аны ыччаттарга аналлаах биэчэр оҥортоон онно аргыый оһуокайы этэн киллэрэн иһэр буоллар эмиэ биир эмэ ыччат күөрэс гыныах этэ.  Чахчы Саха хааннаахтар арыллан иһиэхтээхтэр.

        Аны билигин сахалыы сиэргэ, култуураҕа сүгүрүйэр дьону саха хааннаахха киллэрэҕин буоллаҕа онон төһө  да баҕар көстөр дьүһүнэ омуктуу көрбүтүн иһин оһуохайы хомуһу ис иһиттэн иэйэр — куойар тойуктаах киһини саха хааннааҕынан ааҕыллар буоллаҕа. 

      Түмүккэ, былыр былыргыттан күҥҥэ сүгүрүйэн, таптыыр ытык Оһуохайбыт көлүөнэттэн  көлүөнэҕэ сырдатылла, үөрэтиллэ, утумнанан салҕыы сайдарыгар баҕа санаалаахпын уонна хас биирдии улуус, түөлбэ оһуокайдара сүппэккэ, симэлийбэккэ улуу Олоҥхобут курдук уостан уоска түһэриллэн этиллэ, үҥкүүлэнэ турарыгар!

        Уонна түгэнинэн туһанан «Дархан Этээччи» буоларбар күүс — көмө, өйөбүл буолбут Оһуохай түмсүүм бары кыттааччыларыгар, чуолаан Александр Джурович Даниловка — Дьулуур Хааҥҥа оһуохайым тылын, үҥкүүтүн сыаналаан үрдүк ааты иҥэрбиттэрин эр махталым муҥура суох. Бары үтүөнү, кэрэни, саха алмааһын курдук кытаанах доруобуйаны, ытык оһуохайым курдук кэрэ олоҕу баҕарабын.

Источник:  Дмитрий Оконешников - Сулусхан
 
По теме
Ужасные кадры с места смертельного ДТП - ИА SakhaLife.Ru ДТП в Жатае возле дискаунтера с участием автобуса N109 и легковушки. Говорят, легковая иномарка на встречку выехала, и произошло лобовое столкновение с рейсовым автобусом.
ИА SakhaLife.Ru