Хаартыска: Е.А. Захарова аатынан култуура дьиэтин архыыбыттан
Саха талааннаах ырыаһыттарыттан биирдэстэрэ Екатерина Захарова-Саха Күөрэгэйэ быйыл төрөөбүтэ 105 сыла. Биллэр биир дойдулаахтарын аатын Эмис нэһилиэгин култууратын дьиэтэ сүгэр. Быйыл эмистэр үбүлүөйдээх сылынан былааннаах үлэни ыыталлар, диэн Амма олоҕо хаһыат суруйар.
“Улуу Кыайыы 80 сылыгар биир дойдулаахпыт , саха бастакы мелодистарыттан биирдэстэрэ , ураты кэрэ куоластаах ырыаһыт Екатерина Афанасьевна Захарова — Саха Күөрэгэйэ төрөөбүтэ 105 сылын туолар
.
«Бу сылга кини аатын үйэтитэн “Саха күөрэгэйэ” диэн музыкальнай- хореографическай испэктээги туруорар былааннаахпыт. Испэктээх сценарийын өссө Екатерина Захарова төрөөбүтэ 100 сылыгар, оруобуна хамсык кэмин саҕана “Сир симэҕэ” Арассыыйа көрдөрүүлээх, Саха өрөспүүбүлүкэтин норуодунай ансаамбылын салайааччыта Марианна Васильевна Ефимова суруйбута. Ол сыл өрөспүүбүлүкэтээҕи күрэххэ бу сценарий лауреат үрдүк аатын ылбыта.
Саха Күөрэгэйэ Кыайыыны кытары ыкса сибээстээх. Онон бу сылга бу үлэ көрөөччүгэ бэлэх буолуоҕа. Ону тэҥэ биэс сылга биирдэ ыытыллар “Дойдуҥ дьоно ахтар саныыр” диэн академическай ырыа күрэҕин Амма улууһун култуура уонна норуот айымньытын салалтатын, Амматааҕы оҕо ускуустубатын оскуолатын кытта бииргэ тэрийиэхтээхпит. Кинигэ хаһан баҕарар үйэлээх үлэ буолар. Онон Екатерина Захаровабыт төрөөбүтэ 105 сылынан “Саха Күөрэгэйэ” диэн өйдөбүнньүк кинигэ тахсыаҕа.
Кинигэни биир дойдулаахпыт, историк, летчик, суруйааччы Владимир Ильич Пестерев суруйда. Матырыйаалынан урукку сылларга нэһилиэкпит баһылыгынан үлэлээбит, Екатерина Захарованы үйэтитиигэ үлэлээбит, бастакы кинигэлэри таһаарыыга сүүрбүт-көппүт Мария Романовна Захарова күүс-көмө буолла. Үбүлүөйдээх сылын түмүктүүр тэрээһин Суорун Омоллоон аатынан опера уонна балет театрыгар буолара былааннанар. Бу иннинэ 2023 сыллаахха, Дьокуускай куорат уокуругун кытта үлэлэһэн, музыкальнай ыскмамыайкалар аллеяларыгар Екатерина Захарова аатынан ыскамыайканы туруорбуппут. Манна кини ырыатын куйаар кодунан киирэн истиэххэ сөп”, — диэн Е.А. Захарова аатынан култуура дьиэтин дириэктэрэ Анжелика Иванова сырдатта. ЯСИА
Фото: газета " Амма олоҕо" Источник: ЯСИА
